ਜੇ ਦੁਬਾਰਾ ਕਾਰਗਿਲ ਹੋਇਆ ਤਾਂ ਉਹ ਆਖ਼ਰੀ ਜੰਗ ਲੜਨ ਲਈ ਤਿਆਰ ਹਨ

ਨਵੀਂ ਦਿੱਲੀ:

ਏਅਰ ਚੀਫ ਮਾਰਸ਼ਲ ਬੀ.ਐਸ. ਧਨੋਆ ਨੇ ਮੰਗਲਵਾਰ ਨੂੰ ਕਿਹਾ ਕਿ ਬਾਲਾਕੋਟ ਦੇ ਹਮਲੇ ਨੇ ਏਅਰ ਫੋਰਸ ਦੀ ਸਟੀਕਤਾ ਨਾਲ ਬੰਬਾਰੀ ਕਰਨ ਦੀ ਸਮਰੱਥਾ ਦਾ ਪ੍ਰਦਰਸ਼ਨ ਕੀਤਾ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਭਾਰਤੀ ਹਵਾਈ ਫੌਜ ਹਰ ਕਿਸਮ ਦੇ ਯੁੱਧ ਲਈ ਤਿਆਰ ਹੈ। ਉਨ੍ਹਾਂ ਪਾਕਿਸਤਾਨ ਨੂੰ ਇਸ਼ਾਰਿਆਂ ਵਿੱਚ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਜੇ ਦੁਬਾਰਾ ਕਾਰਗਿਲ ਹੋਇਆ ਤਾਂ ਉਹ ਆਖ਼ਰੀ ਜੰਗ ਲੜਨ ਲਈ ਤਿਆਰ ਹਨ, ਉਹ ਬੱਦਲਾਂ ਵਿੱਚ ਵੀ ਬੰਬਾਰੀ ਕਰ ਸਕਦੇ ਹਨ।
ਧਨੋਆ ਨੇ ਕਿਹਾ ਸਾਡੇ ਕੋਲ ਸਾਰੇ ਮੌਸਮਾਂ ਵਿੱਚ ਬੱਦਲਾਂ ਤੋਂ ਬੰਬਾਰੀ ਕਰਨ ਲਈ ਸਹੀ ਤਾਲਮੇਲ ਹੈ ਅਤੇ ਹਵਾਈ ਸੈਨਾ ਇਸ ਦੇ ਲਈ ਸਮਰੱਥ ਹੈ। ਇਸ ਸਾਲ ਦੇ ਸ਼ੁਰੂ ਵਿੱਚ ਪੁਲਵਾਮਾ ਦੇ ਦਹਿਸ਼ਤਗਰਦੀ ਹਮਲੇ ਤੋਂ ਬਾਅਦ, ਏਅਰ ਫੋਰਸ ਨੇ ਪਾਕਿਸਤਾਨ ਦੇ ਖੇਤਰ ਵਿੱਚ ਬਾਲਾਕੋਟ ਵਿੱਚ ਇਕ ਅੱਤਵਾਦੀ ਟਿਕਾਣੇ 'ਤੇ ਬੰਬ ਸੁੱਟੇ ਸੀ।
ਉਨ੍ਹਾਂ ਕਾਰਗਿਲ ਦੇ 'ਆਪਰੇਸ਼ਨ ਸਫ਼ੈਦ ਸਾਗਰ' ਦੇ 20 ਸਾਲ ਪੂਰੇ ਹੋਣ ਦੇ ਮੌਕੇ 'ਤੇ ਇੱਕ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਕਾਰਗਿਲ ਸੰਘਰਸ਼ ਦੌਰਾਨ ਹਵਾਈ ਸੈਨਾ ਵੱਲੋਂ ਕੀਤੀ ਗਈ ਕਾਰਵਾਈ ਨੂੰ ਯਾਦ ਕੀਤਾ। ਉਹ ਉਸ ਸਮੇਂ 17ਵੀਂ ਸਕਵੈਡਰਨ ਦੇ ਕਮਾਂਡਿੰਗ ਅਫ਼ਸਰ ਸਨ। ਉਨ੍ਹਾਂ ਕਿਹਾ ਕਿ ਇਹ ਪਹਿਲੀ ਵਾਰ ਸੀ ਜਦੋਂ ਮਿਗ-21 ਜੰਗੀ ਜਹਾਜ਼ਾਂ ਨੇ ਪਹਾੜੀ ਖੇਤਰ ਵਿੱਚ ਰਾਤ ਵੇਲੇ ਹਵਾ ਤੋਂ ਜ਼ਮੀਨ 'ਤੇ ਬੰਬ ਸੁੱਟੇ। ਕਾਰਗਲ ਤੋਂ ਪਾਕਿਸਤਾਨੀ ਘੁਸਪੈਠੀਆਂ ਨੂੰ ਖਦੇੜਨ ਲਈ ਚਲਾਏ ਗਏ 'ਆਪਰੇਸ਼ਨ ਵਿਜੇ' ਦੇ ਤਹਿਤ, ਏਅਰ ਫੋਰਸ ਨੇ ਆਪਰੇਸ਼ਨ ਸਫ਼ੈਦ ਸਾਗਰ ਚਲਾਇਆ ਸੀ।